കേരള PSC ഈ വര്ഷം മുതൽ ചില പരിഷ്കാരങ്ങൾ നടപ്പിൽ വരുത്താൻ തീരുമാനിച്ചിട്ടുണ്ട്. നിലവിൽ വിവിധ ആവശ്യങ്ങൾക്കു പിഎസ്സിയിൽ ഇമെയിൽ / തപാൽ വഴി സ്വീകരിക്കപ്പെടുന്ന എല്ലാ അപേക്ഷകളും ഒറ്റത്തവണ റജിസ്ട്രേഷൻ പ്രൊഫൈൽ വഴി മാത്രമാക്കാനുള്ള തീരുമാനമാണ് അതിൽ ഏറ്റവും പ്രധാനം. അപേക്ഷിക്കുന്ന സമയത്തുതന്നെ പരിചയ സർട്ടിഫിക്കറ്റ് അപ്ലോഡ് ചെയ്യുക, നിയമനപരിത്യാഗത്തിന് പ്രത്യക സത്യവാങ്മൂലം നൽകുക, അപേക്ഷകൾ പ്രൊഫൈൽ വഴി മാത്രം സ്വീകരിക്കുക തുടങ്ങി നിരവധി പരിഷ്കാരങ്ങൾ കേരള PSC 2023 മുതൽ നടപ്പിലാക്കാൻ പോവുകയാണ്. അപേക്ഷകളുടെ പുരോഗതി വിലയിരുത്താൻ ഇതിലൂടെ സാധിക്കും.
ജോലിക്കു അപേക്ഷിക്കുന്നതുൾപ്പെടെ ചുരുക്കം ചില സേവനങ്ങൾ മാത്രമാണ് ഇപ്പോൾ പ്രൊഫൈൽ വഴി ലഭിക്കുന്നത്. ഈ ഉത്തരവ് വരുന്നതോടെ ഉത്തരക്കടലാസ് പുനഃപരിശോധന/ഫോട്ടോ കോപ്പി എന്നിവക്കുള്ള അപേക്ഷ, രീക്ഷ/അഭിമുഖം/പ്രമാണപരിശോധന/നിയമനപരിശോധന എന്നിവയുടെ തീയതി മാറ്റത്തിനുള്ള അപേക്ഷ, തുളസി സോഫ്റ്റ്വെയറിൽ പുതിയ വിദ്യാഭ്യാസ യോഗ്യത കൂട്ടിച്ചേർക്കാനുള്ള അപേക്ഷ, സ്ക്രൈബിനുവേണ്ടിയുള്ള അപേക്ഷ, നിയമനപരിശോധനയ്ക് ഫീസ് അടയ്ക്കാനുള്ള സേവനം, ഉത്തരസൂചിക സംബന്ധിച്ച പരാതി സമർപ്പിക്കാനുള്ള അപേക്ഷ, മറ്റു പൊതുപരാതികൾ എന്നിവ പ്രൊഫൈൽ വഴിയാകും.